கொரோனாவால் உயிரிழந்தவர்களின் ஆவிகளுடன் பேசக் குவியும் உறவினர்கள்!
கொரோனாவால் உயிரிழந்தவர்களின் ஆவிகளுடன் அவர்களது உறவினர்கள் பேசும் நிகழ்வு அதிகரித்து வருகிறது!
உலகை அச்சுறுத்திக் கொண்டிருக்கும் கொரோனாவுக்கு தடுப்பூசி கண்டறியப்பட்டு பொது மக்களுக்கு போடப்பட்டு வந்தாலும், நாள்தோறும் கொரோனா பாதிப்புகள் அதிகரித்த வண்ணம் உள்ளன. உலகம் முழுவதும் 10 கோடிக்கும் அதிகமானவர்கள் கொரோனா வைரஸால் பாதிக்கப்பட்டுள்ளனர். 20 லட்சத்துக்கும் அதிகமானவர்கள் உயிரிழந்துள்ளனர். தொடர்ந்து கொரோனா வைரஸ் உலகை அச்சுறுத்திக் கொண்டிருக்கிறது.
இந்த சூழலில் மரபியல் ரீதியாக மாற்றம் பெற்ற கொரோனா வைரஸ் தொற்றானது பிரிட்டன், தென் ஆப்பிரிக்கா, பிரேசில் உள்ளிட்ட நாடுகளில் கண்டறியப்பட்டுள்ளன. கொரோனா சற்றே ஓய்ந்த நிலையில், இரண்டாவது அலை தற்போது மிரட்டிக் கொண்டிருக்கிறது. இதனால் உயிரிழப்புகள் மீண்டும் அதிகரித்து வருவதால், தங்களது பாசத்துக்குரிய நபர்களை இழந்தவர்கள் கடுமையான சோகத்துக்கும், தனிமைக்கும் தள்ளப்பட்டுள்ளனர்.
இந்த நிலையில், கொரோனாவால் உயிரிழந்தவர்களின் ஆவிகளுடன் அவர்களது உறவினர்கள் பேசும் நிகழ்வு பிரிட்டனில் அதிகரித்து வருகிறது. பிரிட்டனில் வசிக்கும் ஜிம் என்பவருக்கு கொரோனா தொற்று உறுதி செய்யப்பட்டுள்ளது. அதற்கு அடுத்த சில நாட்களிலேயே அவரது மனைவி கேட்டுக்கும் தொற்று உறுதியாகியுள்ளது. மருத்துவமனையில் இருவரும் சிகிச்சை பெற்று வந்த நிலையில், ஜிம் மட்டும் உயிரிழந்துள்ளார்.
கொரோனாவில் இருந்து பிழைத்த கேட், தனது கணவரின் இழப்பை தாங்க முடியாமல் தனிமையில் இருந்துள்ளார். அந்த சமயத்தில் தனது நண்பர் ஒருவர் மூலம், ஆவிகளுடன் பேசும் ஜூன் ஃபீல்ட் என்பவரை சந்தித்து, தனது கணவர் குறித்து விசாரித்துள்ளார். தனது கணவர் பயத்தில் இருக்கிறாரா என்று கேள்வியை முன் வைத்த அவரிடம், ஆம், முதலில் உங்களது கணவர் பயத்தில் இருந்தார். ஆனால், தற்போது ரிலாக்ஸாக இருக்கிறார் என்று ஜூன் ஃபீல்ட் தெரிவித்துள்ளார். இதனால், சற்று நிம்மதியடைந்து வழக்கமான வாழ்க்கைக்கு திரும்ப கேட் முயன்று வருகிறார்.
முன்னதாக, முதல் உலகப்போரின் போது, தங்கள் அன்பிற்குரியவர்களை இழந்த ஏராளமானோர் அவர்களின் இழப்பை தாங்கிக் கொள்ள முடியாமல் ஆவிகளுடன் பேசும் நபர்களை அணுகத் தொடங்கினர். அதுபோன்று, கொரோனாவால் உயிரிழந்தவர்கள் குறித்து விசாரிப்பதற்காக ஆவிகளுடன் பேசும் நபர்களை தற்போது தொடர்பு கொள்பவர்களின் எண்ணிக்கை அதிகரிக்கத் தொடங்கியுள்ளது.
கருத்துகள்