சிட்னியில் காணாமல்போன இந்திய இளைஞன் சடலமாக மீட்பு!
சிட்னியில் கடந்த நான்கு நாட்களாக காணாமல்போயிருந்த இளைஞன் சடலமாக மீட்கப்பட்டுள்ளார்.
ராகுல் சிங் என்ற இந்தியப் பின்னணிகொண்ட 19 வயது இளைஞனே இவ்வாறு சடலமாக மீட்கப்பட்டவர் ஆவார்.
குறித்த இளைஞன் கடந்த ஞாயிற்றுக்கிழமை 17ம் திகதி காலை 6 மணியளவில் Alchornea Crescent, Mount Annan-இல் அவதானிக்கப்பட்டதாகவும், அதன் பின்னர் அவரைக் காணவில்லை எனவும் குடும்பத்தினர் தெரிவித்ததையடுத்து அவரைத் தேடும்பணி முடுக்கிவிடப்பட்டிருந்தது
அன்றையதினம் காலை 7 மணியளவில் ராகுல் சிங், Mount Annan தாவரவியல் பூங்காவிற்குள் சென்றுகொண்டிருப்பது cctv கமராவில் பதிவாகியிருந்ததைத் தொடர்ந்து குறித்த பகுதியில் தீவிரதேடுதல் மேற்கொள்ளப்பட்டது.
இந்நிலையில் நான்கு நாட்கள் கழித்து, நேற்று மதியம் 1.40 மணியளவில் குறித்த இளைஞனின் சடலம் Mount Annan தாவரவியல் பூங்காவிலுள்ள நீரணையிலிருந்து மீட்கப்பட்டுள்ளது.
இவரது மரணம் சந்தேகத்திற்கிடமானதாக கருதப்படவில்லை என முதற்கட்டத் தகவல்கள் தெரிவிக்கின்றன.
இதேவேளை குறித்த இளைஞர் bipolar disorder எனும் உளவியல் சிக்கலுக்கு உள்ளாகியிருந்ததாக தெரிவிக்கப்படுகிறது.
கருத்துகள்