தமிழகத்தில் உள்ள இலங்கை அகதிகளை ராஜபக்ஷ அரசு ஏற்குமா.
.
தமிழகத்திலுள்ள இலங்கை அகதிகளை அழைத்து வரும் நடவடிக்கை தற்போது முன்னெடுக்கப்படுவதில்லை என அமைச்சரவை இணைப் பேச்சாளர் அமைச்சர் ரமேஷ் பத்திரண தெரிவித்துள்ளார்.
அமைச்சரவை தீர்மானங்களை அறிவிக்கும் வாராந்த ஊடகவியலாளர் சந்திப்பில் இன்று பேசிய அவரிடம், தமிழ்நாட்டில் அகதிகளாக தஞ்சம் அடைந்தவர்களை மீண்டும் தாயகத்துக்கு அழைத்து வந்து மீள் குடியேற்றம் செய்யப்படுமா என கேட்கப்பட்டது. ஆனால், இந்த விடயம் தொடர்பில் அமைச்சரவையில் கலந்துரையாடப்படவில்லை என அவர் பதிலளித்தார்.
இந்தியாவிலுள்ள இலங்கை அகதிகளை கடந்த காலங்களில் அழைத்து வந்தோம். ஆனால், தற்போது அப்படி அழைத்து வருவதில்லை. அந்த நடவடிக்கை நிறுத்தப்பட்டுள்ளது என்றும் அவர் தெரிவித்தார். தமிழகத்திலுள்ள இலங்கை அகதிகள் தொடர்பிலான தமிழக முதலமைச்சரின் அறிவிப்பை வரவேற்பதாக விளையாட்டுத்துறை மற்றும் இளைஞர் விவகார அமைச்சரும், பிரதமர் மஹிந்த ராஜபக்ஷ்வின் புதல்வருமான நாமல் ராஜபக்ஷ சமீபத்தில் தமது ட்விட்டர் பக்கத்தில் குறிப்பிட்டிருந்தார். இலங்கையில் 2009ஆம் ஆண்டு உள்நாட்டுப் போர் நிறைவடைந்த பின்னர், தமிழகத்திற்கு தப்பிச் சென்று அகதிகளாக தஞ்சம் அடைந்தவர்களை அப்போதைய ஜனாதிபதியாக இருந்த மஹிந்த ராஜபக்ஷ தலைமையிலான அரசாங்கம் அழைத்து வந்ததாகவும் அவர் கூறியிருந்தார்.
புள்ளி விவரங்களின்படி, ஐக்கிய நாடுகள் சபையின் உதவியுடன், 3,567 குடும்பங்கள், தமிழகத்திலிருந்து திருப்பி அழைத்து வரப்பட்டதாகவும் அவர் தெரிவித்திருந்தார். நாடு திரும்பிய இலங்கை அகதிகளுக்கு தேவையான வீடுகள் மற்றும் வாழ்வாதாரங்கள் வழங்கப்பட்டுள்ளதாகவும் அவர் கூறியிருந்தார். இலங்கைக்கு திரும்ப விரும்பும் அனைத்து, இலங்கையர்களின் பாதுகாப்பை உறுதிப்படுத்தி, அவர்களின் வாழ்க்கையை மீள ஆரம்பிப்பதற்கான வசதிகளை ஜனாதிபதி கோட்டாபய ராஜபக்ஷ ,பிரதமர் மஹிந்த ராஜபக்ஷ ஆகியோர் மேற்கொள்வர் என்றும் என நாமல் ராஜபக்ஷ தெரிவித்திருந்தார்.
நாமலுக்கு மனோ கணேசன் பதில் இந்த நிலையில், தமிழகத்திலுள்ள இலங்கை அகதிகளை வரவேற்பதற்கு முன்னர், யாழ்ப்பாணத்தில் 10 ஆண்டுகளாக இடம்பெயர்ந்து முகாம்களில் வாழும் தமிழ் மக்களை மீள்குடியேற்றுமாறு தமிழ் முற்போக்கு கூட்டணியின் தலைவரும், நாடாளுமன்ற உறுப்பினருமான மனோ கணேசன் வலியுறுத்தியுள்ளார். நாமல் ராஜபக்ஷவின் ட்விட்டர் பதிவுக்கு பதில் பதிவாக இந்த கருத்தை மனோ கணேசன் குறிப்பிட்டுள்ளார்.
யாழ்ப்பாணம் - வலிகாமம் வடக்கு, பலாலி உள்ளிட்ட வளமான காணிகளிலிருந்து ராணுவத்தை அகற்றி, இந்த மக்களை தமது சொந்த நிலங்களுக்கு போக அனுமதிக்குமாறும் அவர் கேட்டுக்கொண்டுள்ளார்.
கருத்துகள்