முகக்கவசம் அணியாத ஆஸ்திரேலிய துணைப்பிரதமருக்கு அபராதம்!
ஆஸ்திரேலிய துணைப்பிரதமரும் National கட்சியின் தலைவருமான Barnaby Joyce-க்கு முகக்கவசம் அணியாத குற்றத்திற்காக அபராதம் விதிக்கப்பட்டுள்ளது.
பொது இடமொன்றில் முகக்கவசம் அணியாத குற்றத்திற்காக நாட்டின் துணைப்பிரதமரும் National கட்சியின் தலைவருமான Barnaby Joyce-க்கு 200 டொலர்கள் அபராதம் விதிக்கப்பட்டுள்ளது.
நியூ சவுத் வேல்ஸ் மாநிலத்தின் Armidale என்ற இடத்தில், வாகனத்திற்கு பெற்றோல் நிரப்பியபின் பணம்செலுத்துவதற்காகச் சென்ற Barnaby Joyce, முகக்கவசம் அணியாதிருந்ததை அவதானித்த பொதுமகன் ஒருவர் பொலிஸாருக்கு தகவல் கொடுத்தததையடுத்து அவருக்கு இந்த அபராதம் விதிக்கப்பட்டுள்ளது.
நியூ சவுத் வேல்ஸ் மாநிலத்தில் நடைமுறைப்படுத்தப்பட்டுள்ள பொது சுகாதார அறிவுறுத்தல்களை மீறினார் என்ற குற்றச்சாட்டில் இந்த அபராதம் விதிக்கப்பட்டதாக பொலிஸார் தெரிவித்தனர்.
துணைப்பிரதமர் Barnaby Joyce உட்பட சுமார் 54 பேருக்கு நேற்றையதினம் இவ்வாறு அபராதம் விதிக்கப்பட்டதாக State Emergency Operations Controller துணை ஆணையர் Gary Worboys தெரிவித்தார்.
கருத்துகள்